तिमीलाई दुध नचुसाई जागिरको पछि दौडिने – छोरी, म तिम्रो निर्दयी आमा

छोरी म तिम्रो निर्दयी आमा

तिमीलाई दुध नचुसाई जागिरको पछि दौडिने

म तिम्रो निर्दयी आमा

बिहान उठेर तिमीले ‘मलाई बोक’ भन्दै हात फैलाउँदा

खाना बनाउनुछ भन्दै तिमीलाई छोडेर हिँड्ने

म तिम्रो निर्दयी आमा

तिम्रो रेखदेख गर्न राखेको आया दिदी नआउँदा

एकदिन पनि तिम्रो लागि समय निकाल्न नसक्ने

म तिम्रो निर्दयी आमा

बिहान उठेर ढोकातिर देखाएर

‘मलाई बाहिर घुमाउन लैजाउ’ भन्दा

मलाई अफिस जानुपर्छ ढिला हुन्छ

भन्दै तिम्रो चाहानाको वेवास्ता गर्ने

म तिम्रो निर्दयी आमा

अफिस जान हतार भो भन्दै तिमी रुँदा पनि

तिमीलाई जवरजस्ती कोच्याएर खुवाउने

म तिम्रो निर्दयी आमा

कहिलेकाहीँ मलाई अफिस जान हतार भएको बेला

तिमीले झगडा गर्दा अबोध तिमीलाई गाली गर्ने

म तिम्रो निर्दयी आमा

ज्वरो र रुघाले ग्रस्त पारेर तिमीले

मेरो काखको न्यानोपन खोज्दा पनि

जागिर खान जानुछ भन्दै

तिमीलाई काखबाट उतारेर

भुईँमा राखेर हिँड्ने

म तिम्रो निर्दयी आमा

तिमीलाई घरमा छोडेर कहिलेकाँही

राती समेत जागिर खान जाने

म तिम्रो निर्दयी आमा

त्यसैले त छोरी कहिलेकाहीँ

तिम्रो सानो दिमागले पनि सोच्दो हो,

मामूलाई म भन्दा प्यारो जागिर किन भयो,

हो मलाई यही जागिर प्यारो छ र त

म तिम्रो निर्दयी आमा

तर छोरी थाहा छ तिमीलाई,

त्यही जागिरले दिएको अफिसको कुर्सीमा बसेर

घरमा बस्दा बनाएको तिम्रो हरेक गतिविधिको भिडियो

दिनमा १० औँ पटक र फोटो सयौँ पटक हेरेको

थाहा छ तिमीलाई बाटोमा हिँड्दा भेटिने

हरेक बच्चामा तिम्रो मुहार खोजेको

थाहा छ तिमीलाई तिमीजस्ता बच्चा बोकेर

मागेर हिँड्ने महिलाका हरेक बच्चामा

तिम्रो झझल्को देखेर रसाएका आँसु पुछ्दै हिँडेको

थाहा छ तिमीलाई आफ्नो लागि सामान किन्न जाँदा

तिम्रो लागि मात्र सामान किनेको

थाहा छ तिमीलाई कतिबेला ५ बज्छ

र छुट्टी हुन्छ भनेर बारम्बार घडी हेरेको

थाहा छ तिमीलाई बाटोमा मोटरसाइकलमा बसेका

बच्चाहरु रोएको देख्दा मेरो मुटु दुखेकोे

माफ गरिदेउ छोरी मलाई, मैले तिमीलाई

दिनुपर्ने समय दिन सकिन किनकी

म हुँ तिम्री निर्दयी जागिरे आमा ।