लकडाउनको मौका छोपेर सुन पसलमा लुटपाट गर्ने नेकपाको टि -सर्ट लगाएका पप्पु पक्राउ

धनगडी | सरकारले कोरोना भाइरसको संक्रमण रोक्न जारी गरेको लकडाउनको मौका छोपेर गहना पसल लुट्ने व्यक्तिलाई प्रहरीले पक्राउ गरेको छ ।

प्रहरीका अनुसार बुधबार मध्यरातिको समयमा कैलालीको धनगढी उपमहानगरपालिका–१ स्थित बिनोद कुमार बर्माले सञ्चालन गरेको प्रिया सुनचाँदी गहना पसलमा लुटपाट भएको थियो ।

गहना पसलमा लुटपाट भएको सूचना पाएलगत्तै परिचालन भएको प्रहरीले बिहीबार बिहान १ जनालाई पक्राउ गरेको छ । पक्राउ पर्नेमा धनगढीको कारागार रोडमा डेरा गरी बस्ने ४५ वर्षीय पप्पु गुप्ता छन् ।प्रहरीका अनुसार गुप्ताले प्रिया सुनचाँदी गहना पसल अगाडि नै केही वर्ष पहिलेदेखि फलफूल बेच्ने ठेला राख्दै आएका थिए ।प्रहरीले गुप्ताको डेरामा छापा मारी पानीको ड्रममा लुकाएको अवस्थमा लुटिएका गहनाहरु बरामद गरेको छ ।प्रहरीका अनुसार गुप्ताले अन्य केही व्यक्तिको सहयोगमा लुटपाट गरेको बताएका छन् । प्रहरीले गुप्ताको बयानका आधारमा अन्य केही व्यक्तिलाई समेत पक्राउ गरेपनि उनीहरुको नाम भने सार्वजनिक गरेको छैन ।